Tinig sa Pagtataguyod ng Makabubuti sa Lahat

by: Atty. Carolina Lim-Gamban

Kamakailan lamang ay sinimulan ng Pangulong Ferdinand “Bongbong” Marcos Jr. ang pangangalkal ng mga records ng mga Contractors ng flood control projects ng gobyerno. Sa bilyun-bilyon na budget na nakalaan dito ilang probinsya pa rin ang lubog sa baha sa tuwing may bagyo, malalakas na ulan na dulot ng habagat at ilang weather disturbances. Ilang taon at ilang budget ba ang kailangan upang maisaayos ito? Mistulang ang public service ay naging personal service o private savings sapagkat kitang kita na ang materyales at ang pagkakagawa ay di naaayon sa standard sa mga ilang proyektong nailantad sa balita. Ang nakasalalay dito ay di lamang mga bahay at ari-arian ng mga residente kung saan nakatayo ang mga proyektong ito kundi pati mga buhay nila. Katulad na lamang sa Metro Manila kung saan ang mga ilang nakaranas ng baha ay nadapuan din ng leptospirosis. 

Nailantad din sa madla ang masakit na katotohanan na ang mga proyektong classroom na nagkakahalaga ng humigit kumulang na 3 milyon ay 3 taon kung ipatayo samantalang nagagawa ito ng mga non-government organizations (NGOs) at ng pribadong sektor ng mas mababa sa isang taon at mas mababang halaga. 

Ilan lamang ang mga ito sa kasayangan sa pondo na nangyayari sa gobyerno. Mga kagagawan ng mga iilan na mas marami ang kawalan sa gobyerno at mamamayan. Ito ang mga gawaing naglalantad na may kakulangan sa ating lipunan sa pagtataguyod ng kung ano ang nakabubuti sa lahat. Sabi nga ni Edmund Burke, “All that is necessary for the triumph of evil is that good men do nothing.” Bukod sa lantarang korupsyon, nakalulungkot na nananaig ang ganitong gawain ng mga kawatan at walang pagpapahalaga sa kapakanan ng kapwa tao dahil marami ang mas piniling hindi makialam at tumahimik na lamang. Mahalaga ang ating tinig at ang boses ng bawat isa ay makakatulong upang sitahin at panagutin ang mga taong may sala. Ito ay isang paraan upang makamit natin ang kabutihang para sa lahat.

Sabi nga sa Biblia (Roma 14:7), “Walang sinuman sa atin ang nabubuhay o namamatay para sa sarili lamang.” Kailangan natin ang bawat isa, di lamang sa pang-araw araw na pamumuhay kundi maging sa pagsugpo ng katiwalian. Makiisa sa pag-ulat ng mga proyektong matagal nang nabinbin at di sang-ayon sa standard ang materyales at pagkakagawa. Isulong natin ang pangkalahatang kabutihan sa pamamagitan ng ating pakikiisa sa pagsubaybay at pagsuri ng mga proyektong dapat ay pakinabangan ng mamamayan. Hindi lamang sa flood control projects kundi pati na rin sa iba pang proyektong pang-istruktura - mga tulay, gusali, dike, at iba pa.

Maraming mga paraan upang iparating sa kinauukulan ang mga makikita nating mga maling gawain sa gobyerno. Sumulat at magreport sa 8888 sa kanilang website https://8888.gov.ph, magreklamo sa Anti-Red Tape Authority sa [email protected], ibahagi ang nalalaman sa Contact Center ng Bayan sa contactcenterngbayan.gov.ph, at isumbong sa Pangulo sa website na sumbongsapangulo.ph. Ngayon ang panahon ng pagbabago. Makiisa at makialam para sa pagbabago - pagbabago para sa bagong Pilipinas!